(1).jpg)
24 dekabr tarixi Azərbaycan xalqının yaddaşında xüsusi önəm daşıyan, qürur və fəxarət hissi ilə qeyd olunan əlamətdar gündür. Bu gün müasir Azərbaycan dövlətinin Prezidenti, Şuşa Fatehi, Müzəffər Ali Baş Komandan cənab İlham Əliyevin doğum günüdür. Dövlət başçısının 64 yaşı tamam olur və bu illər Azərbaycan tarixində böyük dönüşlərin, mühüm qərarların, qətiyyətli liderliyin və tarixi qələbələrin illəri kimi yadda qalır.
İlham Əliyev təkcə bir dövlət başçısı deyil, eyni zamanda xalqın iradəsini, milli maraqları və dövlətçilik ideyalarını öz şəxsiyyətində birləşdirən güclü liderdir. Onun rəhbərliyi ilə Azərbaycan müstəqilliyini möhkəmləndirmiş, regional və qlobal müstəvidə söz sahibi olan dövlətə çevrilmişdir. Prezidentin həyata keçirdiyi siyasət Azərbaycanı sabitlik, inkişaf və təhlükəsizlik adasına çevirib.
Cənab İlham Əliyevin intellektual səviyyəsi, zəngin biliyi və geniş dünyagörüşü onu beynəlxalq arenada da fərqləndirən əsas xüsusiyyətlərdəndir. Azərbaycan, rus, ingilis, fransız və türk dillərini mükəmməl bilməsi dövlət başçısına dünya liderləri ilə birbaşa, səmimi və yüksək səviyyəli dialoq qurmaq imkanı verir. Bu amil Azərbaycanın beynəlxalq nüfuzunun artmasında mühüm rol oynayıb.
Prezident İlham Əliyevin ən böyük tarixi missiyalarından biri isə Azərbaycan xalqına Zəfər sevincini yaşatması oldu. 2020-ci il sentyabrın 27-də başlayan Vətən müharibəsi 44 gün ərzində xalqımızın birliyini, ordumuzun gücünü və Ali Baş Komandanın qətiyyətini bütün dünyaya nümayiş etdirdi. Bu müharibə təkcə hərbi deyil, siyasi və mənəvi qələbə idi.
Müzəffər Ali Baş Komandanın dəmir iradəsi və strateji uzaqgörənliyi sayəsində Azərbaycan Ordusu 30 ilə yaxın işğal altında qalan torpaqlarımızı erməni işğalçılarından azad etdi. Bu qələbə ilə Azərbaycan öz ərazi bütövlüyünü bərpa etdi, tarixi ədalət təmin olundu və xalqın illərlə ürəyində daşıdığı nisgil sona çatdı.
Şuşanın azad edilməsi isə bu Zəfərin zirvəsi oldu. Prezident İlham Əliyevin “Şuşa bizimdir!” sözləri artıq Azərbaycan tarixinin qızıl səhifələrinə həkk olunub. Şuşa Fatehi kimi tarixə düşən Prezident, bu müqəddəs şəhəri təkcə hərbi yolla deyil, siyasi iradə və milli ruhla azad etdi.
Zəfərdən sonra Prezident İlham Əliyevin rəhbərliyi ilə işğaldan azad edilmiş ərazilərdə genişmiqyaslı bərpa və quruculuq işlərinə start verildi. Qısa müddətdə yollar, hava limanları, yaşayış məntəqələri, sosial obyektlər inşa olunur, Qarabağ və Şərqi Zəngəzur yenidən dirçəlir. Bu torpaqlarda üçrəngli bayrağımız qürurla dalğalanır.
Dövlət başçısının şəhid ailələrinə və qazilərə göstərdiyi xüsusi diqqət və qayğı da onun humanist və vicdanlı lider obrazını tamamlayır. “Şəhid ailələri və qazilər dövlətin daim diqqət mərkəzindədir” prinsipini əsas götürən Prezident, bu istiqamətdə ardıcıl və real addımlar atır, sosial dəstək mexanizmlərini daim gücləndirir.
İlham Əliyevin rəhbərliyi ilə Azərbaycan Ordusu regionun ən güclü ordularından birinə çevrilib. Ordunun maddi-texniki bazası müasirləşdirilib, hərbi hazırlıq ən yüksək səviyyəyə çatdırılıb. Bu gücün arxasında isə xalqla ordu arasında möhkəm bağ, Prezidentə olan sonsuz inam dayanır.
Prezident İlham Əliyev milli maraqları hər şeydən üstün tutan, prinsipial və qətiyyətli liderdir. O, heç vaxt beynəlxalq təzyiqlər qarşısında geri çəkilməyib, Azərbaycanın haqq səsini bütün dünyaya çatdırıb. Dövlətimizin suverenliyi və müstəqilliyi onun siyasətinin əsas prioritetidir.
Azərbaycanın iqtisadi inkişafı, enerji təhlükəsizliyində mühüm rol oynaması, nəqliyyat-logistika mərkəzinə çevrilməsi də Prezident İlham Əliyevin uzaqgörən strategiyasının nəticəsidir. Bu siyasət xalqın rifahının yüksəlməsinə, ölkənin dayanıqlı inkişafına xidmət edir.
Prezident İlham Əliyev xalqına güvənən, xalqı tərəfindən sevilən və dəstəklənən liderdir. Onun çıxışları, davranışı və qərarları hər zaman milli maraqlara söykənir. Xalq–Prezident birliyi bu gün Azərbaycanın ən böyük gücüdür.
Bu gün 64 yaşını qeyd edən Prezident İlham Əliyev Azərbaycan tarixində Zəfər gətirən Lider, dövlətçiliyin qoruyucusu, milli qürurun simvolu kimi əbədi yaşayacaq. Onun adı müstəqil, güclü və qalib Azərbaycanın tarixi ilə ayrılmaz şəkildə bağlıdır.
Azərbaycan xalqı Müzəffər Ali Baş Komandanını dərin hörmət, sonsuz ehtiram və böyük sevgi ilə təbrik edir, ona möhkəm cansağlığı, uzun ömür və dövlətimiz naminə yeni-yeni uğurlar arzulayır. Zəfər yolu ilə irəliləyən Azərbaycan və bu yolun memarı olan Prezident İlham Əliyev tarixdə öz əbədi yerini artıq tutub.